Hundar og karrý!

Já ég hef komist að því á óyggjandi hátt að hundar og karrý fara ekki saman, í hversu litlu mæli sem það er. Fyrsti hluti þessarar rannsóknar fór fram fyrir u.þ.b. 2 vikum síðan þegar að viðfangið (Åsa) fékk afgang að fiskibollum með karrýsósu (náttúrulega allt í þágu vísindanna). Daginn eftir brunuðum við á Egilsstaði að ná í Hrönn og þegar við lögðum af stað aftur heim (u.þ.b. 24 tímum eftir að karrýát átti sér stað), fékk hundurinn þessa svakalegu drullu í bílinn. Við gátum ekki annað en hent hundalakinu og öllu því tilheyrandi þar sem að ég hafði nú ekki lyst á að setja þetta gums í þvottavélina. Nú! Tveimur vikum síðar (upp á dag) var viðfanginu gefinn afgangur af rækjusalati (með karrýi) ca. 1 dl. Kl. nákvæmlega 5:23 í morgun vakna ég við grunsamleg búkhljóð framan af gangi. Þegar að ég kíki fram er hundurinn búinn að drulla svakalegri hrúgu fyrir framan stigann og er á fullu að æla á teppið sitt. Ég þurfti semsagt að draga fram tusku, poka, hanska, flísatangir og öll tilheyrandi rannsóknargögn til þess að þrífa upp úrganginn. Þessu safnaði ég að sjálfsögðu öllu saman í poka sem að bíður frekari skoðunar hjá sérfræðingum við Háskóla Íslands. Ég tel hlut mínum í tilrauninni formlega lokið og ætla mér ALDREI aftur að gefa hundinum mínum neitt sem hefur komist í snertingu við framandi austurlensk krydd.

Hrabbý van der Scheizespützel

Heilalaxering!

Já í dag er einn af þessum dögum þar sem yours trúlí þyrfti á massívri heilalaxeringu að halda. Hvernig svoleiðis laxering fer fram er ég ekki alveg klár á en ég er nokkuð viss um að hún væri akkúrat það rétta fyrir mig í augnablikinu. Ég er búin að sitja fyrir framan tölvuskjáinn og rembast við að koma út úr mér einhverju af viti, skrifa skýrslu og svoleiðis en ég get bara ekki komið út úr mér neinu gáfulegu. Kannski er dagurinn í dag akkúrat dagurinn sem að ég missi gáfurnar...þá á ég bara útlitið eftir ;-)!!! Það er einhver andskotans pest að ganga og það kæmi mér ekki á óvart að ég hafi bara nælt mér í hana, það væri nú akkúrat eftir mér!

Grænt te virðist ekki vera lausnin heldur þar sem að ég er búin að þamba það í lítratali síðustu daga og ætti því að vera afskaplega græn og hrein að innan . Hægðirnar ættu líka að vera í toppstandi eftir allar trefjarnar og ávextina og hjartað í góðu lagi vegna þess að ég er svo dugleg að fara út að labba. Þetta er greinilega heilinn!!! Hvað ætli sé gott fyrir hann????

Hrabbý van der Brainblocked

Hrönn í heimsókn!

Hún Hrönn "fósturmamma" var í heimsókn hjá okkur um helgina og spáði um leið fyrir Austurbyggðungum og öðrum nærsveitungum. Það var voðalega gaman að hafa hana í heimsókn. Það fyrsta sem við gerðum var náttúrulega að keyra um bæinn og láta hana benda okkur á húsið sem við ættum eftir að kaupa. Það komu nú nokkur til greina að hennar mati og við bíðum bara spennt að sjá hvað verður úr því.

Á laugardaginn bakaði Haddi pönnsur og síðan keyrðum við út á Stöðvarfjörð og keyptum okkur glænýjan steinbít í soðið sem við elduðum svo meistaralega á kvöldið og ég er ekki frá því að við höfum drukkið svona eins og eina rauðvínsflösku með. Í gær eldaði ég svo villikryddað lambalæri a la Hrabbý og við sátum og spiluðum og spjölluðum mest allan daginn. Seinnipartinn kíkti Hrönn svo í spil fyrir okkur Hadda og þar kom margt skemmtilegt og spennandi í ljós sem að gaman verður að sjá hvort að gangi eftir. Hingað til hafa spádómarnir hennar gengið svona 85 % eftir í mínu tilfelli allavega svo að ég krossa bara putta og er bjartsýn.

kveðja
Hrabbý

Pólskar kleinur!


Í gær datt ég í Júróvisjóngírinn í vinnunni! Fór inn á ruv.is og fann þar vísun inn á gríska heimasíðu þar sem hlusta má á öll sigurlög Júróvisjón frá upphafi í gegnum netið!!! Fyrir idíóta eins og mig var þetta náttúrulega gullnáma. Eftir hádegið sat ég semsagt inni á skrifstofu með Júróvisjón í botni og söng hástöfum. Ég veit ekki hvað gestum sveitarstjórnarskrifstofunnar fannst um þennan snarruglaða Húnvetning en ég heyrði einstöku viðlag sungið úr skrifstofunum í kring ;) Vinnan gekk allavega miklu betur og tíminn var fljótari að líða. Eftir að hafa borðað föstudagspizzuna og drukkið föstudagsbjórinn var ég alveg hörð á því að horfa eina bíómynd í sjónvarpinu og vaka til allavega 12...en nei nei klukkan ellefu núll sjö var mín farin að hrjóta í sófanum og svo vöknuð kl. 7 morguninn eftir, kúrði nú samt til hálf tíu. Ég er bara alveg hætt að geta vakað lengi og sofið út. Þetta eru greinileg ellimerki og ég er farin að hafa af þessu talsverðar áhyggjur.

Í dag fórum við í heimsókn til Hafsteins og Boguslöwu á Stöðvarfjörð. Þarf var tekið á móti okkur með pólskum kleinum sem smökkuðust alveg ótrúlega vel. Það var fín tilbreyting að fara í heimsókn og hitta annað fólk og við erum mjög stolt af okkur að vera farin að kynnast fólki :)

Nú er bara að sjá hvort kerlingin nái að horfa að bíómynd í kvöld og sofa leeengi á morgun :)

Over and out

Heilasúpa!

Ég vildi bara láta alla vita að ég er á lífi. Það er bara mikið að gera í vinnunni þessa dagana svo að ég hef ekki mikinn tíma til að blogga. Ég lofa að bæta úr því síðar. Skrifa betur seinna.

Hrabbý van der Verrí Bissí